Aurelio Venuti al è nassût a Reane dal Roiâl tal 1945; si è laureât in Letaris e al à insegnât par cuarante agns tes scuelis dal Friûl. Fin di student al à elaborât un sisteme dut personâl di lei i classics, che si fonde su la traduzion dai tescj a chês altris lenghis imparadis, tignint cont de metriche e dal stîl dai autôrs. Al à let in chest mût i lirics grêcs, i poemis omerics, i poetis latins, voltantju in viers latins, talians o furlans. Plui indenant al à frontât oparis des leteraturis in lenghe d’oil, in lenghe d’oc, in franc-talian, e de leterature taliane des origjins. La Divine Comedie di Dante e je la prime opare che al à publicât in lenghe furlane.
