1265 – Durante (dit Dante) Alighieri al nas a Florence di Alighiero di Bellincione e di Gabriella (dite Bella) degli Abati. No si cognòs la date esate de nassite, ma e cole tal segn dai Zimui, si presum tor i ultins di Mai (Pd XXII, 112-117).
1266 – Manfredi di Svevia, fi di Federico II, al mûr te bataie di Benevento, cuintri Carlo d’Angiò clamât in Italie dal pape. Doi agns dopo, a Tagliacozzo (1268), al ven decapitât Corradino di Svevia (Pg III, 106-132; Pg XX, 67-93). Si stude cussì la sperance di un podê imperiâl in Italie a belançâ la autoritât dal pape, e ducj i tentatîfs seguitîfs in cheste direzion a saran destinâts a falî. Si pues dî che l’insium politic di Dante rapresentât te Comedie al è za sfantât cuant che al nas il poete. La muart di Manfredi e di Corradino a varan come conseguence la parade fûr di Florence dai ghibelins jentrâts cun Farinata degli Uberti, e cualchi pôc dopo, chest destin i tocjarà ancje a Dante, vuelf di part blancje (If X, 31-81).
1271 – E mûr la mari Bella; il pari al spose pôc dopo Lapa di Chiarissima Cialuffi.
1272 – Dante al scomence i studis di gramatiche, dialetiche e retoriche (il cussì clamât «trivio liberale») sot la vuide dal famôs istitutôr Brunetto Latini (If XV, 24-46), ma lis dificoltâts economichis de famee i impediran di completâ i studis superiôrs.
1274 – Al viôt pe prime volte Bice (dite Beatrice) di Folco Portinari (Vita Nova, II-III) e si inamore di jê. Lui al à nûf agns, Beatrice cualchi mês di mancul.
1277 – No ancjemò di dodis agns, al ven imprometût par contrat a Gemma di Manetto Donati. Gemma e aparten a une des fameis plui potentis di Florence, cun fuartis simpatiis papalinis.
1280 – Sot pape Niccolò III Orsini (Dante lu metarà tal infier, If XIX) Florence e vîf un moment di ecuilibri jenfri i partîts politics.
1282 – Al mûr il pari Alighiero.
1283 – Al torne a viodi Beatrice di disevot agns e imprometude a Simone dei Bardi.
1285 – Al spose Gemma Donati che i darà trê fîs, Giovanni, Jacopo, Pietro, e une fie, Antonia. Gemma no larà cun Dante in esili, nancje cuant che i fîs a lassaran Florence par lâ a vivi cun lui.
1289 – Al partecipe ae bataie di Campaldino cuintri Arezzo. Forsit al compon il Fiore e il Detto d’amore, doi poemuts che però no son di sigure atribuzion.
1290 – Beatrice a 25 agns ancjemò no finîts e mûr. Dante al cole intune fonde crisi religjose, di li che al ven fûr studiant filosofie e teologje.
1293 – Giano della Bella al fâs aprovâ i «Ordinamenti di Giustizia»: il «primo popolo» (la nobiltât) al ven taiât fûr dal guvier, in favôr dal «secondo popolo» (la classe mercantîl); si pues jessi elets aes carichis publichis dome se si iscrivisi a une Corporazion o «Arte»; il «popolo magro» dit ancje «popolo di Dio» (salariâts e piçui comerciants) nol à ricognossût nissun dirit; dome dopo il «tumulto dei Ciompi» (1378) al varà i dirits politics.
1294 – Al compon la Vita Nova dedicade a Beatrice. Fin al 1298 al compon ancje lis Rimis, metudis adun in racuelte postume.
1295 – Si note a l’«Arte dei medici e degli speziali» e al scomence une brilante cariere politiche; ta chest an al è za membri dal «Consiglio speciale del popolo».
1296 – Al jentre tal «Consiglio dei Cento» e tal «Consiglio dei Savi» e i son fidadis incarghis di grande responsabilitât.
1300 – Al ven nominât Priôr, la plui alte incarghe comunâl.Ta chest rûl al decrete la condane al confin dai caporions dai vuelfs Blancs (i Cerchi, mercjadants) e dai vuelfs Neris (i Donati, nobii) che si combatin pes stradis de citât. Pape Bonifacio VIII al bandìs l’«anno santo del Giubileo». Dante al met chi l’inizi de Comedie, ma la redazion e scomençarà cualchi an plui tart.
1301 – Bonifacio VIII al mande a Florence Carlo di Valois par meti pâs jenfri lis fazions, ma cun l’intenzion di favorî i Neris. Dante - di part blancje - si cjate in delegazion a Rome.
1302 – Batûts i Blancs, il gnûf guvier al condane Dante al esili par doi agns, cun la interdizion dai publics ufizis e la zonte di une multe. No vint paiât la multe, i vegnin confiscâts i bens e l’esili al devente perpetui, cun condane al fûc se al met pît in citât. Al scomence il lunc esili dal poete.
1303 – I vuelfs Blancs e i ghibelins si unissin par cirî di rientrâ a Florence, ma cence suces (If XXVII, 37-45).
1304 – Al mûr Bonifacio VIII; il sucessôr Benedetto XI al cîr di puartâ la pâs, ma ancje chest pape al mûr (ai 7 di Lui). La bataie «della Lastra» (ai 20 di Lui) e segne la definitive sconfite dal partît di Dante, che al decît di li indenant di fâ part par se stes (Pd XVII, 55-69).
1304-1312. Al va a parâsi dacîs dai Scaligeri di Verone, po dai Camino di Trevîs, dai Malaspina in Lunigjane. Al scomence un moment di intense creativitât leterarie: Convivio (1304-1307), De vulgari eloquentia (1307), Infier (1304-1308), Purgatori (1308-1312). Tra il 1309 e il 1310 al fâs un viaç a Parîs par studiâ filosofie e teologjie.
1310-1313. Arrigo VII di Lussemburgo al ven jù in Italie e al ven proclamât a Rome imperadôr. Dante al rinfrescje l’ideâl di une convivence tra papât e imperi (Monarchia, 1312-1313); insium che però si sprece subit pe muart improvise dal imperadôr.
1315 – Al refude di fruî di une amnistie che i varès permetût di tornâ daûr paiament di une multe e l’umiliante amission di «peccatore pubblico». Ancje i siei fîs a vegnin condanâts a muart e lu seguissin tal esili.
1316-1320. Al è a Verone dacîs di Cangrande della Scala; si dediche a la stesure dal Paradîs.
1321 – Al è a Ravene, ospit di Guido Novello da Polenta. Te gnot dai 13 ai 14 di Setembar, a 56 agns, al mûr di malarie, apene completât il Paradîs. La sô salme e ven sapulide te glesie di San Pier Maggiore a Ravene.